前日應沙田浸信會呂明才中學學生會邀請，去學校度分享我四年嚟政治參與既經歷，昨日就突然有十幾位自稱「一群憤怒的家長」去學校門口示威，遞信比副校長質疑邀請我去學校分享等同「默認以犯法手段爭取訴求」，仲要係令到「交流政治化」同埋「教導學生齊犯法」，原本打算低調處理件事，但直至藍絲製圖，抹黑校長做「教育界塔利班」同埋「邪惡軸心」，我實在要講講我嘅取態。
其實拎住「膜拜皇痴瘋 教育頌歪風」既牌去進行人身攻擊，改我名做「皇痴瘋」都只係反映佢地幾咁低質，我都只會一笑置之廢事同佢地嘈，但班「藍絲」既所作所為卻係證明佢地既手法有幾咁唔夠班同低劣。
一、你地係咪真係沙田呂明才中學嘅家長？
自稱「一群憤怒的家長」抗議，明顯就係想用家長名義增加請願既正當性，簡單嚟講就係用依個身份增加說服力，等更多香港人覺得「啲中學請黃之鋒去分享真係好有問題架」，阻止我地依啲學生代表接觸一般學生嘅機會，但係依班示威人士成個過程都無聲稱自已係間學校家長咪即係「露左底」，我唔係話一定要係間學校既師生家長先可以評論果間學校嘅情況，但依種「個仔唔係喺度讀又要用家長身份發言」真係唔係好掂，要出手打壓阻止乜乜乜都好心高招啲，家陣間學校嘅家長都未出聲，校外中年人士就急住請願遞信影相舉示威牌認真騎呢。
二、點解只得文匯東方太陽三間報館報單新聞？
行動完咗想有傳媒報導當然無可厚非，但搞完個「家長示威行動」，全香港都只得《文匯》、《東方》同《太陽》三份報紙報依單新聞，仲要用上「憤怒家長抗議黃之鋒」、「家長抗議沙田呂中引『鋒』入室」依種標題去報單新聞，立場同取態係啲咩大家都心知肚明，而主流報章嘅《明報》、《蘋果》、《星島》同《經濟》全部都無報導到，咁件事如果得某一個陣營嘅媒體關注，仲要示威者無名無姓（你至少都搵個乜乜家教會出泥先交足戲架嘛），咁係咪真係純粹「家長自發」？抑或其實成個示威行動都有住一個完整嘅政治agenda，往後有邊個雨傘運動嘅代表人物去中學分享，第二日就會有班「中年人士」去示威，即係「邊間學校請黃絲分享，藍絲就去邊間學校示威」？
三、你又知我有教學生犯法？
示威人士批評我「教導學生犯法」，咁我想問如果佢地當日無聽過我分享，佢地作為某程度上嘅「家長」咁個仔女又無去個論壇，又憑乜嘢話我有「教導學生犯法」？其實請個嘉賓嚟學校分享只係為咗聽下佢分享個人經驗同觀點，我從來都無用一個「教導」嘅心態同一班同齡同學講我嘅諗法，咁更加唔好講我根本無呼籲學生參與公民抗命，只係講述點解我個人會選擇用公民抗命嘅手法去爭取民主，其實當日分享一開始我已經同班同學講：「我今日嚟到依度，唔會同你講我係中立同埋完全客觀，作為一個學生組織嘅代表，我絕對有自已嘅立場，但當我講完之後你可以按自已嘅準則去思考，決定你自已同唔同意我嘅睇法，如果你唔同意以及係質疑既話，歡迎一陣問答環節盡情咁發問甚至『挑我機』。」
四、學校請我講青少年政治參與，咁何來「交流政治化」？
同一時間，班「家長」話我將「交流政治化」（即係同學生交流加入好多政治話題之類咁樣）仲更加奇怪，學生會請我去講「青少年參與政治活動的角色」，我唔講政治咁有咩好講？唔通同班同學講我砌高達砌成點？既然學生會邀請得我去分享，學校又批准左嘅話，你地有咩資格去規管人地學校批唔批准？
校長都講到明「因為黃之鋒一直在前線參與政治活動，所以在本年開學便批准了有關決定」，如果藍絲嘅朋友覺得學校唔應該請我去分享嘅話，不如諗下你做校長會請邊個去學校講中學生政治參與？咁事實上建制派陣營真係無一個學生，喺中學既時後就參與政治事務兼有埋媒體曝光，與其不滿學生會請我，不如諗下點解藍絲咁耐以嚟都攻唔入學界依個橋頭堡，學協不成氣候被學聯壓住，中學就連統戰組織用銀彈攻勢都達唔到政治目的，認真慘慘豬。
五、藍絲核心價值：有你無我？有藍無黃？
睇返《明報》都見到沙田呂明才中學嘅溫校長講到明，為左推動學生從唔同角度了解社會議題，都曾經邀請陳方安生、曾鈺成同埋前人大代表擔任校內講座嘉賓，既然學校既立場都係政治中立，容許學生聽唔同政治立場同取態嘅人表述觀點，藍絲覺得只係同一立場嘅人先入得學校分享，係咪人大政協高官就去得，咁泛民議員學生代表全部就唔得，依家藍絲鼓吹「有你無我」嘅政治立場，難道佢地想以後一有政協去學校分享，就有人立即去學校外面追擊個政協，成日話社會撕裂好嚴重，今時今日有著有藍無黃既風氣，咁到底問題係由邊個引起？
講到尾，我唔知到對家藍絲嘅做法未來會唔會繼續變本加勵，但好明顯佢地對於一直攻唔入學界依個橋頭堡深深不忿，難怪見到我去中學分享就有咁大反應，但其實上年考完DSE我就已經去左接近三十間學校分享，學界我哋一定會守住，正所謂「你有張良計，我有過牆梯」，無論你有幾多青年軍同學校交流團，我地都繼續會用我地嘅辦法，守住學界對民主自由信念嘅堅持。
from http://www.inmediahk.net/node/1031098
via IFTTT
沒有留言:
發佈留言